Mij lip ássam lågev gätjástusájt arvusmahttemij skåvlåjda. Jus oahppe li sámegielaga, de máhttá dättov biedjat ietjá sámegielajt oahppát ja jus oahppijn la sámegiella degu amásgiella de hiehpá dán vahko oahppát ienep sámegielav. Hebada åhpadimev ahkejuohkusijda ja barga dan vuossti ahte Giellavahkko sjaddá suohtas ja le juoga masi oahppe ávvusi.
Álgadibme. Álgit vahkov tjielggit Giellavahko birra, ma vidjora li sámegielajn, manen dát vahkko l ájnas ja gåk dijá vahkkoplána vuojnnu.
Giellatjiehka. Ássit sierra tjiegav skåvlån vaj klássalanján giellaoahppamij, interaktijva spelajn, plahkáhtajn ja oahpponävo ma måvtåstuhtti bäjvválasj avtastallamij.
Bivddi guossev. Bivddi guossev gänna l persåvnålasj histåvrrå sámegielláj. Máhttá årrot soames gut la gielav ruoptus válddám, gut la vásedam dárojduhttemav, soames gut lávllu ja nåv vil.
Histåvrråtijmma. Guoradallit ja oahppit sáme histåvrrå birra ja adnit gielav guovdátjin.
Musijkkatijmma. Hiebadihtit musijkkatijmav vuolijda ja sáme musijkkáj. Åvddånbuktit goappátjagá árbbedábálasj musijkav ja popmusijkav.
Sámegieltijmma. Lådnit iednegielav sámegielláj tijmmaplánan. Oahppit sáme bokstávajt ja vuodogárgadisájt ja ságastallit sámegiela struktuvra birra.
Filmma. Gähttjit sáme filmav ja guossodihtit popcornijt oahppijda. Stuorsebrudahka l histåvrrålattjat bájnnám sámesebrudagáv negatijvvalattjat. Vaddit positijvalasj vásadusáv oahppijda gielajn ja dagá dav hávskes tijmmáj.
