Mij la Giellavahkko?

Giellavahko ulmme l sáme gielaj árvov låpptit, ja buoredit máhtov sáme giela ja kultuvra birra ålles sebrudagán. Jur dan vahkon galggi sámegiela gullut ja vuojnnut juohkka sajen.

Giellavahkon mij aktan tjalmostahttep ja buoredip máhtov sámegielaj birra ålles sebrudagán. Priváhta ja almulasj ásadusá, æládusiellem, organisasjåvnå ja ietjá oassevállde bivddiduvvi sámegielajt tjalmostahtátjit jur dan vahkon. Aktan válldep stuoráp åvdåsvásstádusáv sámegielaj gullumis, vuojnnemis ja adnemis gájkajn sebrudaksuorgijn.

Giellavahkko la álgadibme Sámedikkes vuona bielen mij bådij Giellalåpptima almodime aktijvuodajn.

Manen la Giellavahkko ájnas?

Vájku li ájteduvvam gáhtomis, de sámegiela ájn bissu. Doajvvo le. Sámij gaskan la diedulasjvuohta giela ja giellaválljima gáktuj, ja ienep ja ienep ulmutja válljiji sæbrrat kursajda åttjudittjat gielav ruoptus mav mijá mátto li massám. Guovlojn gånnå sámegiella ij la måttijt buolvajt aneduvvam, dálla nuorra ållessjattuga sámegielav ruoptus válldi ja várrogisát gæhttjali dav vijddásappo mánájdisájda vaddet. Ådå sámegielak buolvva sámegielak mánáj li sjaddamin dálla.

Sihke vuona, svieriga ja suoma bielen sámes vásedip ahte stuorsebrudahka ienebut vuosedij berustimev sámegielajda, ja sáme rijkav miehtáj åtsådalli juhte sijá kultuvrra ja giela ienebut dåhkkiduvvi. Berustibme sáme sebrudahkaj la stuorre, ja ájgge goassa aktisasj giellaratjástimev dahkat, ij lulu buorep.

Resursa

Giellaræjdo

Muhtem digitála giellavædtsaga gávnnuji, duola daga duollatjállemdárkastus goappátjagá Windowsij ja Macaj, mobiltastatuvrra duollatjállemdárkastusájn goappátjagá Androidaj ja iOSaj (iPhone ja iPad), báhkogirje ja mahku. Gehtja Divvunabielev ienep sáme giellateknologijjaj.

10/20 bágo

Vuona Sámedigge le Giellavahko aktijvuodan oadtjum dagádum app’av 10/20 bágo, mij dåhkki viettjat android ja iOS telefåvnåj. App’an máhtá vuojnnet, gullat ja låhkåt 10/20 bágo nuortta-, julev- ja oarjjelsámegiellaj. App’a máhttá aneduvvat skåvlån ja mánájgárden, valla diedon aj priváhtaiellemin.

SVuona Sámedigge le stiellim guokta plakáhtajt app’aj, avtan li 10 bágo nuortta-, julev- ja oarjjelsámegiellaj ja nuppen 20 bágo.

Duollatjállemdárkastus

Máhtá viedtjat duollatjállemvædtsagijt MS Office:ij goappátjagá Windowsaj ja Macaj. Dat gávnnu nuortta-, julev- ja oarjjelsámegiellaj.

Tastatuvrra

Máhtá viedtjat sámegielajk tastatuvrav goappátjagá mobijllaj ja dáhtámasjijnnaj. Lågå ienebuv dánna gåktu mobiltastatuvrav viettja ja adnegoadá. Lågå ienebuv dánna gåktu dáhtámasjijnnatastatuvrav viettja ja adnegoadá.

Saemesth

Giellakampánja «sámásta mujna» aktijvuodajn Vuona sámedigge dagáj jagen 2013 lommabáhkogirjátjav. Báhkogirjásj lij vuostatjin nuoraj vuosstij, ájádus hávsskes gåhttjomij sámástit vuostasj æjvvalimen ulmutjij gaskan, árkkabiejven ja ávvudallamin. Ulmutja juohkka álldarin Báhkogirjátjij lijkkujin. Danna ij lim låsså grametihkka, dåssju dárbulasj bágo ja moallánagá. Ulmutja nav lijkkujin Báhkogirjásj ahte sámedigge jagen 2019 dahkin sierra applikasjåvnåv dasi.Danna la jiedna muhtem bágojda ja moallánagájda, dat máhttá aneduvvat dajs gudi sihti oahppat sámegielav, jali dajda gudi sihti oahppat muhtem bágojt ja moallánagájt ietjá sáme giellaj.

Báhkogirje

Gávna báhkogirjijt ienep gielajda dánna:: http://dicts.uit.no/

Nuortta- ja oarjjelsámegielas – Dárogiellaj

Nuorttasámegielas – Dárogiellaj

Oarjjelsámegielas – Dárogiellaj

Julevsámegielas – dárogiellaj

Gåktu máhtá sæbrrat?

Mij hasodip duv prográmmav gæhttjat, gávna ásadimijt ietjada lahkusin. Válde aktijvuodav lagámus giellaguovdátjijn gávnatjit dåjmajt ja ásadimijt vahko tjadá. Giellavahkko adná ietjas facebook bielev «Giellavahkku/Gïelevåhkoe/Giellavahkko/Samisk språkuke» majt hasodip duv tjuovvot jus sidá vuojnnet ådåsijt ja mij dáhpáduvvá Sábmen. Miján la aj Instagram konto «giellavahkku», dánna gávna filmajt, gåvåjt ja ådåsijt váhkov tjadá.

Doajvvop dån oassálasstá geldulasj dåjmajda, dåhkki sæbrrat sihke fysalasj jali digitála ásadimijda. Ande sámegielav sosiála median ålles váhko, oassálaste mijá tjáppa sáme gielajt tjalmostit.

Rája ietjat ásadimev dánna

Plakáhta ja gåvå

Viettja ja ane bigodimen duv dålas.

Divna fijlajt máhta adnet nåvku Sáme giellavahkko dåladimen.