Mii lea Giellavahkku?

Giellavahku ulbmilin lea buoridit sámegielaid stáhtusa, ja buoridit máhtu sámi giela ja kultuvrra birra olles servodagas. Juste dán vahkus galget sámegielat gullot ja oidnot juohke sajis.

Giellavahkku lea veahkkálasbargu čalmmustahttit sámegielaid ja loktet máhtu daid birra olles servodagas. Priváhta ja almmolaš ásahusat, ealáhuseallin, organisašuvnnat ja eará aktevrrat bovdejuvvojit oainnusmahttit sámegielaid juste dán vahkus. Ovttas váldit mii stuorábuš ovddasvástádusa sámegielaid gullomis, oidnomis ja geavaheames buot servodatsurggiin.

Sámediggi Norgga beale mearridii álggahit Giellavahku dalle go almmuhii Giellaloktema.

Manne lea Giellavahkku deaŧalaš?

Vaikko leat áitojuvvon jávkamis, de sámegielat ain bissot. Doaivva lea. Sámiid gaskkas lea dihtomielalašvuohta giela ja giellaválljema ektui, ja eanet ja eanet olbmot válljejit searvat kurssaide oažžun dihtii giela ruovttoluotta maid min máttut leat massán. Guovlluin gos sámegiella ii leat geavahuvvon sohkabuolvva dahje guovtti áiggi, de váldet dál nuorra rávisolbmot sámegiela ruovttoluotta ja geahččalit várrugasat addit dan viidáseappot mánáidasaset. Ođđa sámegielat sohkabuolva sámegielat mánáiguin bajásšaddá dál.

Mii oaidnit ahte stuoraservodat sihke Norggas, Suomas ja Ruoŧas čájehit stuorit beroštumi ja áŋgiruššama sámegielaide, ja sápmelaččat dáin riikkain dovdet ahte sin kultuvra ja giella lea buoret muddui dohkkehuvvon. Beroštupmi sámi servodahkii lea stuoris, ja áigi goas veahkkálaga dahkat giellaáŋgiruššama, ii sáhtášii leat buoret.

Resurssat

Giellareaiddut

Gávdnojit máŋga digitála giellareaiddu dego stávenreaidu sihke Windowsii ja Macii, boallobeavdi mobiilii mas lea stávenreaidu sihke Androidii ja iOS:ii (iPhone ja iPad), sátnegirjjit ja olu eará. Fina Divvun- siiddus geahččamin mii gávdno sámegiela giellateknologiijas.

10/20 bágo

Giellavahku oktavuođas lea Norgga beale Sámediggi buvttadan 10/20 bágo nammasaš áppa maid sáhttá viežžat Android dahje iOS telefovdnii. Áppas beasat oaidnit, gullat ja lohkat 10/20 sáni sihke davvi-, julev- ja lullisámegillii. Áppa sáhttá geavahit skuvllain ja mánáidgárddiin, muhto dieđusge maiddai priváhtta eallimis.

Áppii lea Sámediggi Norgga beale maiddai ráhkadan guokte plakáhta, okta mas leat 10 sáni davvi-, julev- ja lullisámegillii ja okta mas leat 20 sáni. Plakáhtaid gávnnat dás vuollelis.

Divvunprográmma

Sáhtát viežžat čállindárkkistanreaiddu MS Officii sihke Windowsii ja Macii. Dat gávdno sihke davvi-, julev- ja lullisámegielas.

Boallobeavdi

Sihke mobiilii ja dihtorii sáhtát viežžat sámegiela boallobeavddi. Dás oainnát eambbo dieđuid mot vieččat ja geavahat mobiilaboallobeavddi.

Saemesth

Sámediggi Norgga beale ráhkadii 2013:s lummasátnegirjjáža giellakampánja ”Sámás Muinna” oktavuođas. Sátnegirjjáš lei meidnejuvvon nuoraide, ja ulbmil lei somás vuogi mielde hástalit nuoraid sámástit vuosttaš deaivvadeamis, árgabeaivvis ja feasttas. Olbmot juohke agis beroštišgohte girjjážis. Sátnegirjjis ii leat mohkkás grammatihkka, muhto baicca álkes ja ábas frásat.

Girjjáš šattai nu bivnnut ahte Sámediggi Norgga beale 2019:s ráhkadii áppa girjjis. Áppas lea jietna muhtin sániide ja frásaide, ja heive dasa gii háliida oahppat veháš sámegiela dahje dasa gii háliida oahppat sániid ja frásaid eará sámegillii.

Sátnegirjjit

Dás gávnnat sátnegirjjiid iešguđet gielaide: http://dicts.uit.no/

Davvi- ja lullisámegiella – dárogiella

Davvisámegiella – dárogiella

Lullisámegiella – dárogiella

Julevsámegiella – dárogiella

Mot sáhtášit searvat?

Mii ávžžuhit geahččat prográmmas gávdnan dihte lágidemiid du lahkosis. Váldde áinnas oktavuođa iežat guovllu giellaguovddážiin ja jeara sis veahki gávdnat lágidemiid mat leat giellavahku. Mii ávžžuhit maiddai čuovvut giellavahku Facebook-siiddu ”Giellavahkku/ Gïelevåhkoe/ Giellavahkko/ Samisk språkuke”, doppe oainnát olles Sámi ođđasiid. Giellavahkus lea maiddai iežas Instagrama ”giellavahkku” gosa almmuhuvvojit filmmat, govat ja ođđasat olles vahku.

Mii sávvat ahte searvvat Giellavahku gelddolaš dáhpáhusaide, leačča dál fysalaš dahje digitála lágideamit. Čále sámegillii sosiála mediain olles vahku, čalmmustahte min čáppa gollegielaid don maid.

Bija iežat lágideami deike

Plakáhtat ja govat

Viečča ja geavat du lágideami márkanfievrrideamis!

Buot fiillat sáhttet geavahuvvot friija Sámi giellavahku čađaheami oktavuođas.