TINE-mielhkie noerhtesaemien gïelesne
Tsïengelen 2023 raejeste, TINE:en mielhkie Romsesne jïh Finnmarhkesne, dovne nöörjen jïh noerhtesaemien gïelesne mielhkieburhtjesne båata. – TINE:en visjovne lea ektesne mijjieh jielije Nöörjem sjugniedibie, jïh dellie hijven mov saemien ietniengïele vååjnesasse båata mielhkieburhtjide, Tormod Nilsen jeahta, TINE-båanta jïh meatanaajhtere saemien ektiegïehtelimmesne Návet Doallu Deanugeaidnusne Deatnusne.
Duarstan, 27.b. Nilsen, saemiedigkiepresideente Silje Karine Muotka, TINE:en konserneåejvie Gunnar Hovland jïh Kirsten Appfjell Saemiedigkien reeremistie Deatnusne gaavnedin jïh illedahkem laavenjostoste mïerhkesjin – jovkesthgaeriem mïelhkeste vaeltedh dejstie orre burhtjijste.
– Mielhkieburhtje lea joekoen sïejhme dejnie jeenjemes hïejmine, jïh naakede maam bæjjese vaalta dovne aeredsbeapmose jïh iehkedsbeapmose. Vïenhtem saemiengïele mielhkieburhtjine sæjhta meatan årrodh tjetskehkevoetem jïh ïedtjem sjugniedidh jeenjesi luvnie, jïh gegkestem jienebh aaj sijhtieh gïelem lïeredh. Gosse devverde stoerre konserne goh TINE dagkeres voerkes gïeleveeljemem vaalta, dellie dïhte positijve synergijem sjugnede jïh daate laavenjostoe maahta hijvenlaakan vuesiehtidh guktie maahta aalkoeåålmegegïeli statusem nænnoestidh, saemiedigkiepresideente Silje Karine Muotka jeahta, mij lea joekoen madtjele laavenjostojne.
Guvvie jielije Nöörjese
– Daate joekoen luste. TINE:sne barkebe jielije Nöörjem sjugniedidh fïerhten biejjien, jïh saemien gïelh leah vihkeles jïh jielije bielie saemien jïh nöörjen kultuvreaerpeste. Gosse mielhkieburhtjh dovne saemien jïh nöörjengïelesne båetieh Romsesne jïh Finnmarhkesne, dellie TINE:en jïjtsevoete jïh identiteete eantan tjyölkehkåbpoe sjædta. Mijjieh ektiegïehtelimmie, 9000 mielhkiebåantajgujmie goh aajhterh noerhtelistie åarjese, jïh mielhkiem veedtjebe jïh darjobe abpe Nöörjesne jïh edtjebe gellievoetem mijjen laantesne speejjeldidh, TINE:en konserneåejvie Gunnar Hovland jeahta.
Gïelevåhkoe skraejriem veelti
Lij tjåanghkosne Saemiedigkien jïh TINE:en gaskem gïelevåhkoen sjïekenisnie bieliemubpien jaepien mænngan, raeriestimmie saemiengïelen bïjre mielhkieburhtjesne voestegh bööti. Raeriestimmie saemiengïelen bïjre mielhkieburhtjine Gïelevåhkoen tjirkijijstie bööti, jïh lea bielie Saemiedigkien gïeleråajvarimmeste Gïelelutnjeme.
– Saemien mielhkieburhtjine lea visjovnine orreme mijjese Saemiedigkesne guhkiem. Mijjieh joekoen geerjene TINE lea dam saetniedehteme daelie. Gosse mielhkieburhtjh daelie dovne noerhtesaemien jïh nöörjengïelesne båetieh Romsesne jïh Finnmarhkesne, dellie dïhte jååhkesjimmie saemiengïeleste, jïh gellievoetem jïh ektievoetem tjaebpieslaakan lutnjie, prosjekten åvtehke Kirsten Appfjell jeahta.
Aareh orrejaepien raejeste sæjhta aelhkedh mielhkiem dejtie orre burhtjide dievhtedh.
