-Julevsámegielas čuovgadit boahtteáigi

– Mun jáhkán šaddá álkit váldit ruovttoluotta ja fievrridit viidasát min giela ja kultuvrra ođđa teknologiijain, go servodagas ovdánit áššit
jođánit.

Ailo Thomassen lea optimista sámegielaid boahtteáiggi ektui. DJ Ailo lávdenamain lea son buvttadan musihka 2015 rájes. 2023:s oaččui son iežas rádioprográmma NRK mP3 kanalas, ovdal go álggii NRK P3 ja radioprográmmii P3Sommer.

– Mun lean hui giitevaš go leat nu olu arenat ja vejolašvuođat sámi dáiddáriidda odne, mii lei jurddaškeahttá máŋga jagi das ovdal. NRK:s, gos mun barggan, geavahan dávjá julevsámegiela. Mun ráhkadan podcasta Dálla ja Dalloj ovttas Naima Nergårdiin, ja mis lea dat gudni gullat julevsámegiela miehtá Sámi.

Ailo lohká ahte váilevaš julevsámegieloahpahus lea dagahan ahte son lea massán oasi gielas, muhto son geahččala buoremus lági mielde.

– Mun halan daid sániid maid dovddan iežan bearrašiin ja singuin geat leat mu birrasis.

-Makkár dilis lea sámegiella du mielas?

– Mun jurddašan eanaš dan buori beali. Mun han beasan telefuvnnain oaidnit, gullat ja lohkat julevsámegiela, goas ja gos hálidan! Gielddain, fylkkain ja gávpogiin leat sihke gálbbat ja plakáhtat sámegillii! Mun beasan gullat iežan eatnigiela stáhtakánalas! Sáhtan maid gullat otná dálkki julevsámegillii.

Stuora vejolašvuođat

Ailo lea aiddo álgán julevsámegiela kursii Nord universitehtas. Su mielas leat stuora vejolašvuođat sámi nuorain geat hálidit juoida olahit, leaš dal borramuša, musihkka, dáidda dahje komediija birra sáhka.

– Maŋimuš jagi lean lávkestan, ja mearridan geahččalit ollašuhttit aigumušaid ja iežan kultuvrra ovddidit olles máilbmái. Áiggun ráhkadit ođđa musihka fárrolaga eará sámi artisttaiguin, ráhkadit doaluid ja digitála máilmmi masa mii buohkat sáhttit oassálastit – beroškeahttá geat ja gos mii leat.

Dárbbašit eanet sisdoalu ja eanet reaidduid

Ailo ohccala nuoraide eanet sámegielat fálaldagaid, nu mo ovdamearkkadihte tv-ráiddut, spealut, filmmat, podkásttat ja fysalaš deaivvadanbáikkit vái besset sámástit.

– Nuorat servet digitála máilbmái ja leat olámuttos. Interneahta bokte mii doallat oktavuođa, guoimmuhit ja oahppat ođđa áššiid. Mearkkaša ollu go beassá dákkár sajiin sámástit.

Giela boahtteáiggi birra

Ailo lea ilus go leat nu olu earát geat hálidit oahppat sámegiela.

– Mus leat guokte njealjejahkásaš neabi geat áddeba visot maid dajan sámegillii, ja dat ligge mu váimmu. Giella lea deháleamos go galgá fievrredit ja nannet kultuvrra. Mun barggan buot maid sáhtan seailluhit ja fievrridit viidásat giela ja kultuvrra maid máttut leat addán munnje musihka bokte! Rávisolmmožiin lea dat šaddan okta mu váibmoáššin.

Ailo buoremus rávvagat mo seailluhit sámegiela

• Leage aktiiva sámi birrasis!                                                                   
• Ovttastala eará sámiiguin. Mii leat juohke sajis!
• Oahpa, juogat ja vásit sámi perspektiivvaid, dat nanne gullevašvuođa Sápmái.
• Searvva sámi doaluide! Mis leat ollu festiválat miehtá jagi, ja doppe beassa leat ieš.
• Čuovo sámi profiillaid ja siidduid SoMe:s! Doppe oaččot inspirašuvnna, oahpat juoidá ja čanat oktavuođa eará sámiiguin.