Bargá ealli Norgga ovddas

Mielkeboanda Jon Evald Hætta oaivvilda ahte son bargá ealli ja máŋggabealat Norgga ovddas go bargá meieriijafitnodaga TINE ovddas.

Iežas sámi duogáža dihte diehtá Jon Evald makkár lea bargat luonddu mielde ráhkadan dihte árvvuid.

– Mii sápmelaččat leat máŋga duhát jagi bargan dán luonddu mielde ja mis lea historjá mainna oažžut leat rámis. Sihke boazodoalus ja mielkebuvttadeamis doibmet eallit, olbmot ja luondu ovttas, dadjá Hætta.

Sus lea oapmedoallu ovttas eamidiinnis ja guvttiin mánáin ja doallu lea Luoktagáttis Guovdageainnus. Dáppe buvttaduvvo sullii 200 tonna mielki juohke jagi ja doallu hálddaša 600 dekára gietti maid atná dollui.

– Mun válden badjelassii oapmedoalu 2015:s ja 2018:s rievdadin luovosdoallonávehin (gusat besset vázzit luovos návehis), muitala Jon Evald. Mun lean hui rámis leahkit oassi jurdagis váldit atnui olles Norgga ja ráhkadit biepmu báikkálaš resurssaiguin, dadjá Hætta ja lasiha:

– Munnje lea dehálaš ahte boahttevaš buolva joatká oapmedoaluin ja historjjáin. Mun doaivvun ja sávan ahte mielkebuvttadeapmi joatkkašuvvo Finnmárkkus. Mun lean optimista.

Rámis máŋggabealatvuođain

– TINE višuvdna lea ”Ovttas mii hábmet ealli Norgga” ja dainna mii háliidit fuomášuhttit máŋggabealatvuođa mii mis lea Norggas. Mii atnit árvvus go min mielkebuvttadeaddjiid gaskkas leat olbmot geat ovddastit Norgga eamiálbmoga. Mii leat máŋga jagi hupman man dehálaš lea bargat luonddu mielde – iige luonddu vuostá. Buoremus ovddasteaddjit dákkár filosofiijai leat sii geat váldet mielde sámi duogáža ja jurddašanvuogi bargui buvttadit biepmu olles Norgga álbmogii, dadjá TINE gulahallanhoavda Sindre Ånonsen.

Son sávvá ollu lihku dán jagi prográmmain Giellavahku lágideddjiide ja sávvá dan fuomášuhttit ahte sámi kultuvrras ja gielain lea stuora sajádat sihke ealáhus- ja servvodateallimis Norggas.