TINE-mielki davvisámegillii
Ođđajagimánu 2023 rájes lea TINE mielkepáhkain Romssas ja Finnmárkkus sihke dárogiella ja sámegiella. – TINE višuvdna lea ahte mii ovttas hábmet ealli Norgga, ja de lea hui buorre go mu eatnigiella, sámegiella, ihtá mielkepáhkkii, dadjá Tormod Nilsen, TINE-boanda ja sámi searvedoalu Návet Doalu mieleaiggát Gárdagis Deanus.
Nilsen, sámediggepresideanta Silje Karine Muotka, TINE konseardnahoavda Gunnar Hovland ja Sámedikki hálddahusa bealis Kirsten Appfjell besset duorastaga golggotmánu 27. beaivvi deaivvadit ávvudan dihte ovttasbarggu ja juhkat mielkki ođđa mielkepáhkas.
– Eanas ruovttuin lea mielkepáhkka hui dábálaš ja dakkár mii adno sihke dalle go borrá iđitborramuša ja eahketborramuša. Jáhkán ahte sámegiella mielkepáhkas boktá oallugiin sáhkkiivuođa ja beroštumi, ja sávan maiddái ahte eambbogat háliidit oahppat giela. Go ná stuora fitnodat go TINE dahká dakkár dihtomielalaš giellaválljema, de dat duddjo positiivvalaš synergiija, ja dát ovttasbargu lea buorre ovdamearkan dasa movt álgoálbmotgielaid stáhtusa sáhttá nannet, dadjá sámediggepresideanta Silje Karine Muotka, gii lea hui duhtavaš ovttasbargui.
Govvida ealli Norgga
– Dát lea hirbmat somá. Mii TINEs bargat juohke beaivvi dan ovdii ahte hábmet ealli Norgga, ja sámegielat leat dehálaččat ja ealli oassin, sihke sámi ja dáža kulturárbbis. Go mielkepáhkain Romssas ja Finnmárkkus lea sihke sámegiella ja dárogiella, de oidnogoahtá TINE iešvuohta ja identitehta vel čielgaseappot. Mii leat ovttasdoaibmafitnodat, man eaiggáduššet 9000 mielkeboandda davvin gitta lulás. Mii viežžat ja buvttadit mielkki miehtá Norgga, ja mii galgat speadjalastit iežamet riikka máŋggabealatvuođa, dadjá TINE konseardnahoavda Gunnar Hovland.
Sámediggi vuolggahii ášši
Beannot jagi áigi lei Sámedikkis ja TINEs čoahkkin Giellavahku oktavuođas. Dan čoahkkimis evttohedje Giellavahku ovddasteaddjit bidjat sámegiela mielkepáhkaide. Giellavahkku lea oassi Sámedikki giellaáŋgiruššamis Giellaloktemis.
– Mis Sámedikkis lea guhká leamaš višuvdnan oažžut sámegiela mielkepáhkaide, ja leat hui movttegat dál go TINE lea duohtan dahkan dan. Dat go mielkepáhkat ihtet davvisámegillii dárogiela lassin, čájeha ahte sámegiella dohkkehuvvo ja dat maiddái čájeha máŋggabealatvuođa ja searvevuođa vuogas vugiin, dadjá prošeaktajođiheaddji Kirsten Appfjell.
Ođđajagis deavdigohtet mielkki dáidda ođđa mielkepáhkaide mas lea sámegielteaksta.
