Parga ellee Taažâ oovdân

Mielkkitáálun Jon Evald Hætta uáivild, ete sun parga ellee já maaŋgâmuáđusii Taažâ oovdân jieijâs pargoost meijerfinnodâh TINEin.

Jon Evald tiätá jieijâs säämi tuáváá tiet maht kalga tuoijuđ áárvuid luándu mield.

– Mii sämmiliih lep porgâm taam luándu mield maaŋgâ tuhháát ive já mist lii historjá mast uážžu leđe čiävláá. Elleeh, ulmuuh já luándu tuáimih oovtâst sehe puásuituálust já mielkkipyevtitmin, Hætta iätá.

Sust lii Kuovdâkiäinust Luoktagáddi-nommâsâš mielkkitáálu kálguinis já kuovttijn párnáinis. Táálu pyevtit suullân 200 toonâ mielhi jyehi ive, já táálust láá tooimâs várás 60 hehtaar verd enâmeh.

– Mun algâttim šiiveettuálu ive 2015 já muttim tom šiljostâhnavittin ive 2018, Jon Evald muštâl. Šiljostâhnavittist kuusah peesih väzziđ riijâht naavit siste. Mun lam uáli čiävláá tast ete peesâm leđe mield pyevtitmin purrâmuš páihálij resursijguin vâi oles Taažâst lii purrâmušpyevtittem, Hætta iätá já lasseet:

– Munjin lii tehálâš ete puáttee suhâpuolvâ juátká šiiveettuálu já historjá. Mun tuáivum ete mielkkipyevtittem juátkoo Finnmarkist. Mun lam optimist.

Čiävláá maaŋgâmuáđusâšvuođâst

– TINE visio lii “Oovtâst mij rähtip ellee Taažâ”, já mij halijdep pyehtiđ tain Taažâst kávnojeijee maaŋgâmuáđusâšvuođâ uáinusân. Mij anneep tom áárvust ete mist láá mielkkipyevtitteijein ulmuuh kiäh ovdâsteh Taažâ algâaalmug. Mij lep maaŋgâ ive sárnum tast mon tehálâš lii porgâđ luándu mield – ijge tađe vuástá. Sij, kiäh väldih säämi tuáváá já jurdâččemvyevi mield paargon  pyevtittiđ purrâmuš oles Taažâ aalmugân, láá tággáár filosofia pyeremuuh ovdâsteijeeh, iätá TINE viestâdemhovdâ Sindre Ånonsen.

Sun tuáivut luho Kielâoho uárnejeijeid taan ive ohjelmáin já tuáivu ete tot čáittá, ete säämi kulttuurist já kielâin lii stuorrâ sajadâh Taažâ iäláttâs- já siärvádâhelimist.