Giella eallá nu guhká go dan geavahat. Giellavahkku 2026 almmuha sámegielat rámidangeneráhtora, vai sáhtát illudahttit muhtuma sámegillii beroškeahttá máhtát go giela vai it. Generáhtor hutká rámiid buot sámegielain, nu ahte vaikko leat ge sámegielat, de daiddát oahppat juoidá ođđasa eará sámegielas.
Dán jagi giellavahku fáddá lea giellaealáskahttin, ja erenoamážit hálidit čálmmustahttit daid sámegielaid mat leat eanemusat áitojuvvon. Unnimus sámegielaide lea juohke áidna sánis, mii daddjo dahje čállo, stuorra árvu. Mii diehtit ahte sáhttá leat stuorra lávki hállagoahtit giela maid ii leat mánnán oahppan. Giellaealáskahttin lea danin seamma ollu duostama go máhtu birra.
Dán jagi giellavahkus movttiidahttit du almmuhit juoidá sámegillii, ja rámidit nuppi lea vuogas álgu!
Ná dagat
Geavat rámidangeneráhtora ja juoge fiinna dieđu muhtumiin gii dan ánssáša, ovdamearkka dihtii sosiála mediain. Juoge maid áinnas generáhtorsiiddu. Man ollu rámiid mii nagodit ráhkadit Giellavahkus?
Juohke sánis ja rámis lea stuorra árvu!