Rijkajgasskasasj Sáme giellavahkko 2022
Gïelevåhkoe/ Giällavahkkuo/ Giellavahkko/ Giellavahkko/ Giellavahkku/ Kielâokko/ Ǩiõllneä’ttel/ Samisk språkvecka/ Samisk språkuke/ Saamen kielten viikko
Giellavahkko, Sáme giellavahkko, tsuojgot dal sáme gielajt näljádis jahkevuoron. Sámedikke Svierigin, Vuonan ja Suoman gåhttju gájkajt oassálasstet ja oassálasstet bájkálattjat, dajvalattjat ja rijkalattjat dán aktisasj dåjman. Sávadus la sáme giela galggi vuojnnut, gullut ja aneduvvat gájkka sebrudakguovlojn Giellavahkkon. Giellavahkko sjaddá 43. vahkon, gålgådismáno 24-30 b.
Giellavahkko álgaduváj Aktidum Nasjåvnåj (AN) álggoálmmukjagen (IYIL 2019). AN la dal nammadam jahkelågev 2022-2032 álggoálmmukjahkelåhken, the International Decade of Indigenous Languages (IDIL). Jahkelåhke galggá måvtåstuhttet dagojda bisodittjat, suoddjitjit ja åvddånahtátjit gájkka värálda smáves gielajt. Aktisasj rahpamceremoniddja Giellavahkkuj ja álggoálmmukjahkelåhkåj ásaduvvá Snoasen, Vuonan. Vuona Majestähtta Gånågis Harald oassálasstá rahpamceremoniddjaj. Svieriga Sámedikke stivrraåvddåulmusj, Vuona ja Suoma Sámediggepresidenta ja Vuona Suohkan- ja dajvvaministar oassálassti aj. Giellavahko rahpam dagáduvvá jahkásattjat umasse bájkijn Sámeednamin ja diedet álgov aktisasj ávvudallamij ja sáme gielaj vuojnnusij buktemij ålles Sámeednamin.
Diededibme ásadimij hárráj Sámeednama birra, hábbmim adnet Giellavahkon ja ietjá anedahkes ábnnasa gávnnuji www.giellavahkku.org. Máhttelis la aj tjuovvot Giellavahkov sociálalasj mediajn.
Hashtag mij aneduvvá sociálalasj mediajn:
- Oarjjelsámegiella #gïelevåhkoe
- Ubbmemsámegiella #giällavahkkuo
- Bihtámsámegiella #giellavahkko
- Julevsámegiella #giellavahkko
- Nuorttasámegiella #giellavahkku
- Anársámegiella #kielâokko
- Gålldåsámegiella #ǩiõllneä’ttel
– Ulmme sáme giellavahkujn la rijkarájáj rastá vuojnnusij buktet, ij val Sámeednamin ájnat ålles sebrudagán, boandásvuodav mij la mijá gájkka gielajn. Mij sihtap lasedit máhttudagáv gielaj birra ja aledit sáme gielaj stáhtusav Håkan Jonsson javllá, stivrraåvddåulmusj Svieriga Sámedikken.
– Buorre l vuojnnet gåktu sáme giela tsuojgoduvvi ja aneduvvi Giellavahkon. Mån riek ávvusav gå mån manáv biebbmoboargálij ja vuojnav sáme galbajt. Iejvvit sáme mánájt gudi ságasti sáme gielav la árvulasj gå vuoset man boandá sáme giela li, Jonsson duoddi.
– Rijkarájáj rastá Giellavahkko l ájnas vaj sáme giela viessu suoma, svieriga, vuona ja gárjjela rijkarájáj rastá. Le ájnas ja luondulasj gájkka sámijda mij aktan vuojnnusij buktep ja nanustahttep mijá vájmogiela árvov álmmugin. Giellavahkko l aktisasj barggo vuojnnusij buvtátjit sáme gielajt ja lasedit diedojt daj birra ålles sebrudagán. Aktan mij åvdåsvásstádusáv válldep vaj sámegiela gulluji, vuojnnuji ja aneduvvi ålles sebrudagán Vuona sámediggepresidännta Silje Karine Muotka.
– Giellavahko ulmme l vuojnnusij buktet sáme gielajt álmmugij. Jus sáme giela galggi vuojnnut ja gullut ålles sebrudagán, de l ájnas stuoráp dåjmadiddje oassálassti dán ájnas bargguj, ja viehkedi vuojnnusij buktet sáme gielajt ja aledit daj stáhtusav. Dade ienep dåjmadiddje gudi mierredi vuojnnusij buktet sáme gielajt, dadi ienebut sáme giela vuojnnuji. Mij gåhttjop gájkajt oassálasstet vuojnnusij buktet ja aledit sáme gielajt. Goappátjagá unnep ja stuoráp dago li ájnnasa, Muotka dieddel.
– Gájka li sávadum oassálasstet Giellavahkkuj! Mån bivddiv aj gájkka ietjá dåjmadiddjijt oassálasstet: vidnudagá, organisasjåvnå, siebre, fábmudagá, ja priváhttaulmutja. Le ájnas nåv ållusa gå máhttelis oassálassti vaj oassálasstem la nåv vijdesbirástiddje gå máhttelis sebrudagá gájkka åsijn, vaj sáme giela aneduvvi dájváj ja ednagit Giellaváhkon. Mån dårvustaláv nåv ållusa gå máhttelis mieluduvvi ja oassálassti Giellavahkon, Sámedikke åvddåulmusj Tuomas Aslak Juuso javllá.
– Mån dårvustaláv gájka gudi oassálassti Giellavahkon máhtti vuojnnusij buktet sáme gielajt sijá árggabiejven. Le sieldes ájnas gájkajda, at máhttá gullat ja adnet ietjas gielav árggabiejven. Giellavahkon máhttá buojkulvissan adnet sáme galbajt, ja adnet diededimtevstajt sámegiellaj jali manen ij guládallat sámegiellaj? Ietján gå gudi oassálassti Giellavahkon de máhtti ásaduvvat umasse ásadime giellaj ja kultuvrraj. Smávva ihtaga li aj ájnnasa! Ájnnasamos la oassálasstet ja vuojnnusij buktet sáme gielajt Giellavahkon, Sámedikke åvddåulmusj Tuomas Aslak Juuso javllá.