Mõõzz Sääʹm ǩiõli neäʹttel lij vääžnai?
Huõlǩâni tõʹst, što sääʹm ǩiõl lie vaarrvuâllsa, ǩiõl jieʹlle nânnsanji. Tuäivv kuuitâǥ lij. Säʹmmlain lij tieʹttemvuõtt jiiʹjjes ǩiõlâst da ǩiõllvaʹlljummšin. Jäänbõs oummuin äʹlǧǧe vuässõõttâd kuursid, što sij vuäitče vuäǯǯad mååusat ǩiõl, koonn ääiʹjab puõlvvõõǥǥ lie mõõntam. Vuuʹdin, koin sääʹmǩiõl ij leäkku leämmaž ââʹnnmest õõut leʹbe kueiʹt puõlvvõõǥǥ äiʹǧǧen, väʹldde nuõr vuõrâsoummu ååʹn sääʹmǩiõl mååusat da ǩiččle seʹrdded tõn päärneez. Ođđ sääʹmǩiõllsaž päärnai puõlvvõk lij šõddmen.
Taar, Ruõcc di Lääʹd peäʹl Sääʹmjânnmest ǩiõččlââʹstet, što õhttsažkåʹdd čuäʹjat šuurab perstummuž sääʹm ǩiõlid, da säʹmmla täin jânnmin ǩiõččlâʹstte šuurab seännmõõžž sij kulttuuʹre da ǩiõʹlle. Perstummuš sääʹm õhttsažkåʹdde lij šurr da ääiʹjpodd õhttsaž ǩiõllǩiččlõõttmõʹšše ij vuäitči leeʹd pueʹrab.
Mäʹhtt vuäitak pueʹtted mieʹldd?
Siâzztõõllâp ǩiõččâd prograamm, što kaaunak jäʹrjstum šõddmõõžžid tuu âlddsin. Vääʹld õhttvuõđ tuu ââldmõs ǩiõllkõõskõʹsse da kõõjj seeʹst vieʹǩǩ, što kaaunak ǩiõllneäʹttel šõddmõõžžid. Siâzztõõllâp še seuʹrrjed Sääʹm ǩiõli neäʹttel Facebook-seeid “Giellavahkku/ Gïelevåhkoe/ Giellavahkko/ Samisk språkuke”, koʹst vuäinak obb Sääʹmjânnam ođđsid. Sääʹm ǩiõli neäʹttlest lij še jiiʹjjes Instagram “giellavahkku”, koʹst õlmstââʹttet fiiʹlmid, kaartid da ođđsid neäʹttelpââʹj.
Tuäivvap, što vuässõõđak Sääʹm ǩiõli neäʹttel hervvai šõddmõõžžid, juʹn-a fyyslaž leʹbe digitaalʼlaž šõddmõõžžid. Ǩeeʹrjet sääʹmǩiõʹlle sosiaalʼlaž mediast obb neäʹttelpââʹj, da puuʹt ton še mij kåʹllǩiõlid kuâsttjeeʹjen.
